ரசிகர்களின் ரசனை உயர வேண்டும். ரசனை உயர்ந்தால் நானும் உயர்வேன், என்று கமல்ஹாஸன் தனது பிறந்த நாள் செய்தியாக கூறியுள்ளார். கமல்ஹாஸன் இன்று தனது 57 வது பிறந்த நாளைக் கொண்டாடுகிறார்.இந்த பிறந்த நாளுக்கு அவர் ரசிகர்களுக்கு விடுத்துள்ள செய்தி:பிறந்த நாளுக்காக ரசிகர்களுக்கு
விடுக்கும் செய்தி என்னவென்று கேட்கிறார்கள். ரசனையைத் தவிர வேறு என்ன சொல்ல முடியும். அதுதான் முக்கியம் உங்களுக்கு நல்ல ரசனை இருக்க வேண்டும். அப்போதுதான் என் தொழில் நல்ல தொழிலாக இருக்கும். உங்கள் ரசனை உயர உயர நானும் உயர்வேன்.
என்னுடைய தனிப்பட்ட கூட்டம் ஒன்றுள்ளது. அவர்களுக்கு நான் சொல்லிக் கொள்வதெல்லாம், சினிமா, நடிகன், நட்சத்திரம், அந்தஸ்து என்பதெல்லாம் தற்காலிகமானது என்று திண்ணமாக நம்புபவன் நான். அதையும் தாண்டி, ஒரு நிலையை நாம் வாழ்ந்தோம் என்பதற்கு சின்னமாக, நாம் வாழ்ந்ததற்கான சாயல்களை வடுவாக இல்லாமல் சின்னமாக விட்டுச் செல்ல வேண்டுமானால், அது வரும் சந்ததியினர் - சமுதாயம், நாம் வாழ்ந்த இடங்களை சுத்தமாக வைத்திருப்பது போன்றவைதான். அதைத்தான் என் சகோதரர்களுக்கு, நானும் கற்றுக் கொண்டு அவர்களுக்கும் கற்றுத் தர முயற்சித்து வருகிறேன்.
முடிந்தவரை என் வாழ்க்கையை அப்படி வாழ்வதற்கான முயற்சிகளில் நான் ஈடுபட்டுக் கொண்டிருக்கிறேன். அவர்களையும் ஈடுபடுத்துகிறேன். இதான் நான் என் ரசிகர்களுக்கு சொல்லுவது. நானும் என் ரசிகன்தான். என்னுடைய கடுமையான விமர்சகனும்கூட. அப்படித்தான் நீங்களும் இருக்க வேண்டும்.
என்னைப் பொருத்தவரை நான் நடிகன், கலைஞன். மலர் போன்றவன். அதனால் அதை எப்படிப் பாதுகாக்கணுமோ அப்படி பாதுகாத்துக் கொள்வேன். விமர்சனங்களை மெலிதாகச் சொல்லி, வாடிவிடாமல் இருக்க அவ்வப்போது பாராட்டு தண்ணீர் தெளித்துக் கொண்டிருக்க வேண்டும். அதைத்தான் நானும் உங்களிடம் எதிர்ப்பார்க்கிறேன். நன்றி, வணக்கம்!
-இவ்வாறு அவர் கூறியுள்ளார்.
கமல் என்ற சகாப்தம்... சக கலைஞர்களின் வாழ்த்து மழை!
இன்று பிறந்த நாள் காணும் கமல் ஹாஸனுக்கு தமிழ் திரையுலகினர் வாழ்த்துக்களைக் கூறி வருகின்றனர்.
களத்தூர் கண்ணம்மாவில் தனது திரையுலகப் பயணத்தைத் தொடங்கி இன்று விஸ்வரூபம் எடுத்து நிற்கும் உலக தமிழ் நாயகன் கமல்ஹாஸனுக்கு இன்று சூப்பர் ஸ்டார் ரஜினி வாழ்த்துத் தெரிவித்தார்.
அவருடன் மேலும் பல பிரபலங்கள் வாழ்த்துத் தெரிவித்துள்ளனர். அவர்கள் விவரம்:
சரத்குமார் - தலைவர், திரைப்பட நடிகர் சங்கம்
பத்மஸ்ரீ கமல் ஹாஸன் அவர்களுக்கு எனது இதயப்பூர்வமான பிறந்த நாள் வாழ்த்துக்கள். தமிழர்களுக்கு மிகவும் பெருமையைத் தந்துள்ள மாபெரும் கலைஞர் அவர். இன்னும் பல்லாண்டுகள் திரையுலகில் புதுப்புது சாதனைப் படைக்க வாழ்த்துகிறேன்.
ஏ ஆர் முருகதாஸ் - இயக்குநர்
கமல் சார் பற்றி பேசும்போதெல்லாம் நான் பெருமையாக உணர்வேன். திறமையான, சாதனைப் படைத்த கலைஞர் என்பதையும் தாண்டி, ஒரு தமிழராக நம்மை நெஞ்சு நிமிர வைத்த நாயகன் அவர். அவர் காலத்தில் நான் ஒரு தமிழ் சினிமா இயக்குநராக இருந்தேன் என்பதே பெருமை. அவருக்கு பிறந்த நாள் வாழ்த்து சொல்வது மகிழ்ச்சியான தருணம்!
சூர்யா - நடிகர்
கமல் சார் பற்றி நான் சொல்லி தெரியும் நிலை இல்லை. கலை உலகின் பிதாமகன் அவர்தான். அவரைப் பார்த்து நடிக்கக் கற்றுக் கொண்டவன். அவருக்கு வாழ்த்து சொல்லும் அளவு நான் பெரிய ஆள் இல்லை. ஆனால் அவரை வணங்கும் தகுதி உள்ளது. கமல் சார்... உங்கள் மூலம் நாங்கள் கற்றுக் கொள்ள வேண்டியது நிறைய உள்ளது.
அசின் - நடிகை
கமல் சாருக்கு எனது மனப்பூர்வமான பிறந்த நாள் வாழ்த்துக்கள். என் வாழ்க்கையில் ஒரு மிகப் பெரிய லட்சியம் நிறைவேறியது. அதற்கு காரணம் நம்ம கமல் சார்தான். ஆம். தசாவதாரத்தில் அவருடன் நடித்ததன் மூலம் என் கனவு நிறைவேறியது. நன்றி சார்.
0 கருத்து:
கருத்துரையிடுக